Məhsəti Gəncəvinin əsas obraz olduğu bir roman yazmaq cəsarət tələb edir. Haqqında çox az şey bilinən şairimizi romanda canlandırmaq, rübailərinin hansı ilhamdan yarandığını göstərməyə çalışmaq olduqca maraqlı fikirdir və bu çətin işin öhdəsindən gəlmək xüsusi məsuliyyət tələb edir. Bu baxımdan müəllifi təbrik edirəm.

Lakin “Məhsəti” romanı mətn olaraq ürəyimdən tikan çıxarmadı. Hadisələrin XI əsrdə baş verməsinə baxmayaraq, dialoqlar çox müasir səslənir, müəllifin üslubunda təqribən min illik fərqi hiss etmək olmur. Bundan başqa Məhsəti şəxsiyyətinin yetişməsi, adi qız uşağının şərq ədəbiyyatına yön verən şairə çevrilməsi prosesi çox da dərin qatlarla göstərilməyib.

Bütün hallarda, romanın sujeti maraq doğurur. Əsərin dili oxucuya gözlənilən zövqü bəxş etməsə də, hadisələrin gedişatı məntiqi bütövlüyünü qoruyur.

Müəllifə təşəkkür edir, yaradıcılığında uğurlar arzulayıram.