Həkimin feysbuk səhifəsinə ad günündə xeyli adam yazmışdı. Sadə "təbriklər"dən başqa, dostlarının şan-fəşanlı, atəşli, alovlu təbrikləri də az deyildi, "dostum", "gözəl insan", "gözəl həkim" kimi müraciətlərlə başlayırdı çoxu, "yüz yaşa", "Allah səni bizə çox görməsin" kimi arzularla bitirdi. Dəqiq hiss olunurdu ki, həkimin çox adama yaxşılığı dəyib, çoxlarının sağlamlığını özünə qaytarıb. Hələ aralarında ona "həyatını borclu olanlar" da var idi. Ona görə də ad günündə onu təbrik etmək, sevindirmək, yanında olduqlarını göstərmək istəyirdilər.

Ancaq həkim dörd ay idi ki, vəfat etmişdi.