annotasiya

"Bir milyonluq xəyanət" sırf özünəqəsd problemi üzərində yazılan ilk azərbaycandilli romanın – "Doktor Səid" romanının birinci hissəsidir. Burada oxucu intihar hadisələrinə "niyə?" sualı verən Səidi tanıyır, onunla birlikdə bu qlobal problemin arxasında duran səbəbləri üzə çıxarmağa çalışır. Baş qəhrəman araşdırdığı hər hadisədə yeni müəmmalarla qarşılaşır, hər pillədə daha dərinə enərək, nəhayət, öz ruhunun qaranlıq məqamları ilə üzləşməli olur. Əsərdə müəllif öz obrazını "bağışlamır", onun reallıqdan ayrılıb öz müqəddəs amalı yolunda rahat addımlamağına icazə vermir, əksinə, özünü bütövlükdə intihar hadisələrini araşdırmağa həsr etmiş Doktor Səidi gerçək həyatın zəruri çətinlikləri ilə də sınağa çəkir. Bu roman sizi düşündürəcək, intihar hallarına fərqli bucaqlardan baxıb sorğu-sual etməyə çağıracaq, personajların timsalında insan psixologiyasının dumanlı güzərgahlarında gəzdirib fərqli hisslər yaşadacaq.

Oxucu rəyləri

• “Bu romanı illər əvvəl oxusam da, hələ də təsirindəyəm. Yerli müəlliflərdən, müasir Azərbaycan romanlarından kiməsə kitab tövsiyə etdikdə ilk ağlıma gələn əsərlərdəndir. Bu, Vüsal bəyin ilk əsəri olsa da, həm mövzusunu, həm dilini çox bəyənmişdim. Əminəm ki, kitabla tanış olan hər kəs dediklərimi təsdiq edər”.

  SƏRXAN RÜSTƏMOV

  kitab təbliğatçısı

• “İntihar mövzusunda roman yazmaq həssas və dərin analiz tələb edir. Vüsal Aydının bu romanı fərdi və sosial aspektləri, psixoloji və fəlsəfi düşüncələri ustalıqla bir araya gətirir. Ədəbi üslubunun yumşaqlığı oxucuya dərindən təsir edir. İlk səhifələrdən müəllifin mövzuya etik yanaşdığını və mütəxəssislərlə məsləhətləşdiyini görmək mümkündür. Bu səbəbdən yazıçıya xüsusi təşəkkür edirəm”.

  FİDAN AZƏRQIZI

  psixoloq, Gənclərin Sosial tərəfdaşlığı Mərkəzinin idarə heyətinin sədri

• “Məncə, “Bir əsərə müəlifdən sonra ən yaxşı bələd olan kimdir?” sualına rahatlıqla “Redaktor” cavabını vermək mümkündür. Bu romanda yazıçının – Dr. Vüsalın iki əsas uğuru var: birincisi, baş obrazın işdə qarşılaşdığı tıxanmalarla onun daxili dünyasını məharətlə yoğurmasıdır; ikincisi, hər obrazın ayrıca dünya olması. Təhkiyənin cazibəsi redaktorun belə fikrini yayındırır, mətndən ayrılmaq istəmirsən, “redaktor”dan “oxucu”ya adlayıb sətirləri zövqlə qovalayırsan, sonra da haradasa ayılır, geri – təshihə qayıdırsan.”

  İMANYAR QULİYEV

  redaktor

• “Əsərin ən gözəl cəhətlərindən biri də bu qədər intihar hadisələrinin arasında belə oxucunu pessimist deyil, pozitiv ruha kökləməsi və kitabdan ağır düşüncələrlə ayrılmasına qətiyyən yol verməməsidir”.

  ƏMİNƏ İBRAHİMLİ

  filologiya üzrə Fəlsəfə Doktoru, Dosent

• “Dərin zəka, hərtərəfli intellekt, müasir yanaşma və bədii təxəyyülün harmoniyası olan “Doktor Səid”in nə zamansa dünya bestsellerləri siyahısında olacağına şübhə etmirəm”.

  CƏLİL CAVANŞİR

  yazıçı, şair, tərcüməçi

• “Vüsal Aydının yazıçı kimi xüsusi özəlliyi ədəbiyyatın irrasionallıq dumanında itib-batmaması, zamanında məsələnin fövqünə qalxıb üfüqə boylana bilməsidir. Klassik şablonlarda boğulan ədəbi mühit və reforma ehtiyacı olan ədəbiyyatın boynundan fonendoskop asılan bir obraz – Doktor Səid ehtiyacı var”.

  SƏRDAR AMİN

  yazıçı, “Partizan” sənət platformasının direktoru

• “Özünəməxsus personajlar izdihamından təxəyyülün və istedadın qoxusu açıq-aydın hiss olunur. Görünməz əllər real obrazlara şahmat fiqurları kimi toxunur... Doktor Səid məni öz dünyasına dəvət edərkən xəbərdarlıq etdi: burada bir az ağıl işlətmək lazımdır. Ona həm həsəd aparıram, həm də yazığım gəlir”.

  XAN

  yazıçı, “Hürr” romanının müəllifi

• “İntihar, yoxsa cinayət?! Oxucunu hadisələrə Doktor Səidin iti gözləri ilə baxmağa məcbur edən və bu sualı hər səhifədə yenidən düşündürən “Bir milyonluq xəyanət” insan psixologiyasının ən qaranlıq guşələrinə işıq salır. Bu roman hüquqi baxımdan da son dərəcə maraqlı və oxunaqlı əsərdir”.

  ZAUR VƏLİMƏMMƏDLİ

  hüquqşünas